SERIKALI YATOA SHILINGI BILIONI 8.4 KUJENGA KAMPASI MPYA YA TPSC TANGA

MTWARA – Serikali imetoa jumla ya Shilingi bilioni 8.4 katika kipindi cha miaka mitatu kwa ajili ya ujenzi wa Kampasi mpya ya Chuo cha Utumishi wa Umma Tanzania (TPSC) mkoani Tanga, hatua inayolenga kusogeza huduma za mafunzo karibu na watumishi wa umma na wananchi. Fedha hizo zinajumuisha Shilingi bilioni 4.3 zilizotengwa kwa ajili ya mwaka mpya wa fedha wa 2026/27 unaoanza Julai mwaka huu.

Ufadhili huo mkubwa wa miundombinu umebainishwa leo, Juni 11, 2026, na Mkuu wa Chuo hicho, Dkt. Ernest Mabonesho, mkoani Mtwara wakati wa ufunguzi wa Baraza la Sita la Wafanyakazi wa chuo hicho. Dkt. Mabonesho alieleza kuwa ujenzi huo unaendelea vizuri sana baada ya chuo kupokea Shilingi bilioni 1.5 katika awamu ya kwanza na Shilingi bilioni 2.6 katika awamu ya pili kutoka Ofisi ya Rais, Menejimenti ya Utumishi wa Umma na Utawala Bora.

Akizungumzia uwekezaji huo wa serikali, mgeni rasmi katika uzinduzi wa baraza hilo, Naibu Katibu Mkuu wa Utumishi, Bw. Xavier Mrope Daudi, amewataka watumishi wa chuo hicho kuhakikisha uwekezaji huo unaenda sambamba na ongezeko la tija, uadilifu, na matumizi bora ya mifumo ya TEHAMA ili kurahisisha utoaji wa mafunzo nchini. Bw. Daudi alisisitiza kuwa TPSC ndilo "jiko" linalopika watumishi wa umma, hivyo lazima kiwe mfano wa kuigwa katika utoaji wa huduma bora.

Bw. Daudi aliongeza kuwa matunda ya uwekezaji na kazi nzuri inayofanywa na chuo hicho tayari yameanza kuonekana, kwani yamechangia kwa kiasi kikubwa kupunguza idadi ya watumishi wasio na maadili serikalini na kuongeza uwajibikaji maeneo ya kazi. Alitoa wito kwa watumishi hao kutumia lugha zenye staha na heshima wanapohudumia wateja ili kuongeza ufanisi wa taasisi hiyo.

Kuhusu mkutano huo wa baraza la wafanyakazi mkoani Mtwara, Dkt. Mabonesho alifafanua kuwa wajumbe 64 kutoka kampasi zote sita nchini wamekutana kujadili na kupitisha Mpango Mkakati mpya wa Miaka Mitano (2026/27 – 2030/31) pamoja na makadirio ya bajeti ya mwaka ujao wa fedha. Baraza hilo linatumika kama jukwaa muhimu la ushirikiano na mashauriano kati ya menejimenti na wafanyakazi ili kuimarisha ustawi wao na wa taasisi.

Mkuu huyo wa chuo alihitimisha kwa kuwahakikishia watendaji wa serikali kuwa wafanyakazi wa TPSC wamejipanga kufanya kazi kwa weledi na uadilifu mkubwa ili kuunga mkono kwa dhati malengo ya maendeleo na mapambano dhidi ya umaskini yanayoongozwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan.